Presidentja e vendit, Vjosa Osmani ka shprehur ngushëllime për vdekjen e diplomatit amerikan dhe mikut të Kosovës, Frank G.Wisner, i cili vdiq sot në moshën 86-vjeçare.

Në telegram thuhet se karriera e tij e gjatë dhe e ndritur në shërbim të diplomacisë amerikane, përfshirë rolin e tij si emisar në bisedimet për statusin e Kosovës, ka lënë një gjurmë të pashlyeshme në historinë tonë, shkruan Arbresh.info.

“Z. Wisner ishte një njeri i përkushtuar ndaj paqes dhe stabilitetit, duke vepruar me mençuri e integritet në momentet vendimtare të diplomacisë ndërkombëtare. Kontributi i tij në çështjet globale, si dhe angazhimi i tij për Kosovën, do të kujtohen me mirënjohje dhe respekt të përjetshëm”, thuhet në telegram.

Aty theksohet se Osmani kishte nderin të punojë për së afërmi me Ambasadorin Wisner për vite të tëra dhe për herë të fundit bisedoi në telefon me të para pak muajsh për t’i uruar sukses në betejat shëndetësore me të cilat po përballej.

“Kujtimi dhe vepra e tij do të mbeten gjithmonë pjesë e historisë sonë. I përhershëm qoftë kujtimi për diplomatin dhe mikun e Kosovës, Frank G. Wisner!”, thuhet në telegramin e Presidentes Osmani./Arbresh.info/